Ўрганиш ва мулоҳаза қилиш орқали имонингизни яна ҳам мустаҳкам қилинг

«Бу китоб улуғ хизмат ва раҳбарлик қилаётган катта жамоат замирида нима ётганини тушунтиради... Муқаддас Китобни синчковлик билан ўрганишнинг ажойиб маҳсули бўлган ушбу асар Худо очган ҳақиқатлар устида чуқур мулоҳаза қиладиган одам томонидан ёзилган... Бу шунчаки борлиқ мавжудотнинг яратилиши ёки "Ибтидо" китоби ҳақидаги асар эмас. Руҳоний Пак ота-боболар шажараси орқали одамзоднинг қутқарилиши ва гуноҳдан фориғ бўлишнинг тарихий асосларини кўрсатади... Ушбу ёндашув китобхонларга аждодлар қиссасини шунчаки ҳаётий ҳикоялар сифатида эмас, балки тарихий жиҳатдан ҳозирги авлодлар билан боғлиқ бўлган тимсол сифатида кўриш имконини беради. Муқаддас Китобни ҳар бир ўқувчининг "шахсий тарихи"га айлантира олиши бу китобнинг энг катта ютуғидир».

«Муқаддас Китобда баён этилган сирли, руҳий ҳақиқатларни кенг очиб беради. . . Руҳоний Пакни Худонинг тинчлиги камайган ҳозирги, машаққатли даврда том маънода Худодан берилган тилшунос, донишманд десак бўлади. . . У ҳатто илоҳиётшунослар учун ҳам мураккаб бўлган жуда баҳсли масалаларни ҳал қилади. . . ажойиб ва таҳсинга сазовор ютуқ. . . Мен дунёнинг барча жамоатларига Ибтидо китобидаги насабномаларни мамнуният билан тавсия қиламан, уларни нафақат масиҳийларнинг руҳий интилишларини қондирадиган, балки имон йўлида етукликка интилганлар учун зарур восита бўлади дея оламан».

«Шу пайтгача ҳеч бир илоҳиётшунос ёки руҳоний Исо Масиҳнинг насабномаси асосида қутқарилиш тарихи режасини Эски Аҳд тарихига суянган ҳолда бу даражада иш олиб боришга қўл урмаган.»

«Унинг илоҳиёт борасидаги фикрлари содда қилиб айтганда, аҳдга ва қутқарилиш тарихига асосланади. Муқаддас Китоб «аҳдлар китобидир» ва бу қаторда энг биринчиси аёлдан туғиладиган зот ҳақида ваъда бўлади. Бу ваъда Ибтидо 3:15 да, Одам Aто ва Момо Ҳаво гуноҳ қилганларидан кейин берилган. То Исо Масиҳ келиб, янги аҳдни ўрнатмагунига қадар Худойи Таоло одамзод билан Ўз аҳдини янгилашда давом этаверди. Муаллиф Исо Масиҳнинг насл-насаби асосида буни жуда аниқ қилиб тушунтиради.»

«Бугунги кунга қадар мен шахсан 40 дан зиёд китоб ёзганман. Бу китоб муаллифи мендан мутлақ бошқа даражада эканлигига амин бўлдим. Менинг ишим шунчаки илмий тадқиқот бўлади, аммо муаллифнинг бу асари бутун Муқаддас Китобни қамраб олган чуқур руҳий тадқиқотдир. Қутқарилиш тарихи туркуми Муқаддас Китоб борасида чуқур тушунчага эга бўлмаган одам учун амалга ошириб бўлмайдиган асар. Исонинг насабномасига оид ҳақиқатларни муаллиф қилганидай кенг очиб беришга бугунги кунга қадар ҳеч бир олим ёки илоҳиётшунос муяссар бўлмаган. Ушбу китобда муаллиф дунё, жамоат ва илмий доиралар вакиллари эргашиши керак бўлган имон йўлини аниқ очиб беради. Менимча, ушбу китоб руҳий ташналик даврида Кореядаги жамоатлар учун ажойиб барака манбаи бўлади».

Доктор Абраҳам Пакнинг "Қутқариш тарихи" туркумига бағишлаган бир умрлик меҳнати унинг ислоҳотчилик эътиқодига асосланган ажойиб асардир. Ислоҳотчи чўпоннинг қалбини Аҳд илоҳиётига бўлган садоқатичалик кенг очиб берадиган мавзу бўлмаса керак. Бу мавзу Муқаддас Китобнинг ўзига хос нуфузини, Ўз аҳди орқали одамзодни қутқарилиш мақсади сари йўналтирган Худонинг тарих давомида қилган ишлари ва мутлақ ҳукмронлигини, шунингдек, азалда “аёлдан туғилиши” ваъда қилинган ва бокира қиз орқали дунёга келган ягона Нажоткоримиз Исо Масиҳнинг бетакрорлигини кўрсатади. Доктор Пакнинг ҳаёти ва фаолияти унинг Ислоҳот ва конфессионал илоҳиётнинг марказий ва ҳал қилувчи тамойилларига бўлган садоқатини кўрсатади. Унинг ҳаёт йўли ва ижоди Раббимизнинг насллар ҳақидаги аҳдига бўлган садоқатини очиб беради».