လေ့လာသင်ယူခြင်းနှင့် သုံးသပ်ဆင်ခြင်ခြင်းဖြင့် သင်၏ယုံကြည်ခြင်းကို ခိုင်ခံ့စေပါ

“ဤစာအုပ်သည် သူ၏ ကြီးမြတ်သော ဓမ္မအမှုတော်နှင့် သင်းအုပ်အမှုကို ဆောင်နေသည့် ကြီးမားသော အသင်းတော် အကြောင်းကို ရှင်းပြထားပါသည်။ ကျမ်းစာကို စေ့စပ်သေချာစွာ လေ့လာမှုနှင့်အတူ သမ္မာကျမ်းစာအပေါ် နက်နဲကျယ်ပြန့်စွာ နားလည်သောသူတစ်ဦးမှ ရေးသားထားခြင်း ဖြစ်ပါသည်။ ဤစာအုပ်သည် ဖန်ဆင်းခြင်း၏ မူလအစ၊ ကမ္ဘာဦးဆိုင်ရာ အကြောင်းအရာထက်ပင် နက်နဲသာလွန်သဖြင့်၊ သိက္ခာတော်ရ ဒေါက်တာ ပါ့ခ်သည် ဘိုးဘေးများ၏ ဆွေစဉ်မျိုးဆက်များမှ ကယ်တင်ခြင်း သမိုင်းနှင့် ရွေးနှုတ်ခြင်း၏ အရေးပါသော အခြေခံအုတ်မြစ်ကို ရှာတွေ့ထားပါသည်။ သူ၏ရှုထောင့်အမြင်သည် စာဖတ်သူတို့အား ဘိုးဘေးများ၏ ဘဝဇာတ်လမ်းကို ၎င်းတို့ဘဝ၏ ဇာတ်လမ်းအဖြစ်အပျက် အဖြစ်သာ မရှုမြင်စေဘဲ၊ ယနေ့ ကျွန်ုပ်တို့၏ မျိုးဆက်နှင့် ဆက်စပ်မှုရှိသော ပကတိပုံစံအဖြစ် ရှုမြင်စေပါသည်။ သမ္မာကျမ်းစာကို ‘မိမိတို့၏အကြောင်း’ အဖြစ်သို့ ပြောင်းလဲပေးခြင်းသည် ဤစာအုပ်၏ ထူးခြား ပြောင်မြောက်လှသော အောင်မြင်မှုတစ်ရပ်ပင် ဖြစ်ပါသည်။”

“သမ္မာကျမ်းစာ၏ ဝိညာဉ်ရေးရာ လျှို့ဝှက်နက်နဲမှုများကို ဖွင့်ဟသွန်သင်ပေးသော သိက္ခာတော်ရ ဒေါက်တာ ပါ့ခ်သည် ဘုရားသခင်၏ နှုတ်ကပတ်တော် ရှားပါးလာသော ယနေ့ ရှုပ်ထွေးမှုန်ဝါးနေသည့် ခေတ်ကာလအတွင်း ဘုရားသခင် ကျွန်ုပ်တို့ထံ စေလွှတ်တော်မူသော ဘာသာစကား၌ ကျွမ်းကျင်ပါရမီရှင်တစ်ဦးပင် ဖြစ်ပေ၏။ ဓမ္မဗေဒ ပညာရှင်များပင် အလွယ်တကူ မဖြေရှင်းနိုင်သည့် အငြင်းပွားဖွယ် အကြောင်းအရာများစွာကို ဆွေးနွေးတင်ပြ ထားပါသဖြင့် အံ့မခန်း ဂုဏ်ယူဖွယ်ရာ အောင်မြင်မှုတစ်ရပ်ပင် ဖြစ်ပါသည်။ ကမ္ဘာဦး ဆွေစဉ်မျိုးဆက်များ စာအုပ်သည် ယုံကြည်သူတို့၏ ဝိညာဉ်ရေးရာ ဆာငတ်မှုများကို ဖြည့်ဆည်းပေးသည်သာမက ယုံကြည်ခြင်း၌သာ၍ ရင့်ကျက်သော အသက်တာကို တောင့်တသောသူများ အတွက်လည်း မဖြစ်မနေ ဖတ်ရှုသင့်သော စာအုပ် ဖြစ်သောကြောင့် ကမ္ဘာတစ်ဝှမ်းရှိ အသင်းတော်များအားလုံးထံသို့ ဝမ်းမြောက်ဂုဏ်ယူစွာ အကြံပြုထောက်ခံအပ်ပါသည်။

“ယနေ့ထိတိုင်၊ ယေရှုခရစ်၏ ဆွေစဉ်မျိုးဆက်တွင် ပါဝင်သည့် ရွေးနှုတ်ခြင်း သမိုင်းဆိုင်ရာ စီမံခန့်ခွဲမှုနှင့် စပ်လျဉ်း၍ ဓမ္မဟောင်းကျမ်းထဲမှ သမိုင်းဆိုင်ရာ နောက်ကြောင်းလိုက် လေ့လာခြင်းကို မည်သည့် ဓမ္မပညာရှင် သို့မဟုတ် သင်းအုပ်ဆရာတစ်ဦးကမျှ ကြိုးပမ်းအားထုတ်ခြင်း မရှိသေးပါ။”

“သူ၏ ဓမ္မအယူဝါဒသည် ရိုးရှင်းစွာ ဆိုရလျှင် ရွေးနှုတ်ခြင်းသမိုင်းနှင့် ပဋိညာဉ်ဆိုင်ရာ အကြောင်းအရာအပေါ် အခြေခံထားပါသည်။ သမ္မာကျမ်းစာသည် ပဋိညာဉ် ကျမ်းစာစောင်ဖြစ်ပြီး၊ ထိုအထဲမှ ပထမဆုံး ပဋိညာဉ်သည် ကမ္ဘာဦး ၃:၁၅ တွင် အာဒံနှင့် ဧဝတို့ ကျဆုံးပြီးနောက် ပေးသနားခဲ့သော မိန်းမ၏အမျိုးအနွယ်ဆိုင်ရာ ကတိတော်ပင် ဖြစ်သည်။ ဘုရားသခင်သည် ယေရှုခရစ် ကြွဆင်းလာ၍ ပဋိညာဉ်တရားသစ်ကို တည်ထောင်တော်မူချိန်အထိ သူ၏ပဋိညာဉ်တော်ကို ဆက်လက် အသစ်ပြုပြင် တော်မူသည်။ စာရေးသူက ယေရှုခရစ်၏ ဆွေစဉ်မျိုးဆက်ဇယားမှတစ်ဆင့် ထိုအကြောင်းအရာကို ရှင်းလင်းစွာ တင်ပြထားပါသည်။”

“ကျွန်ုပ်သည် အခုအချိန်ထိ ကိုယ်တိုင်စာအုပ်ပေါင်း ၄၀ ကျော် ရေးသားခဲ့ပါသည်။ ဤစာအုပ်ကို ရေးသားသူမှာ ကျွန်ုပ်နှင့် လုံးဝခြားနားသည့် အားသာချက်တွင် ရှိနေသည်ကို တွေ့ရပါသည်။ ကျွန်ုပ်၏ ရေးသားချက်များသည် ပညာရပ် ဆိုင်ရာ လေ့လာမှုတစ်ရပ်သာ ဖြစ်၍ ဤစာအုပ် ရေးသားသူ၏ အရေးအသားများသည် သမ္မာကျမ်းစာ တစ်ခုလုံးကို ထိုးဖောက်နားလည်နိုင်သည့် နက်နဲသော ဝိညာဉ်ရေးရာ လေ့လာမှုပင် ဖြစ်ပါသည်။ ရွေးနှုတ်ခြင်းသမိုင်း စာအုပ်တွဲသည် သမ္မာကျမ်းစာကို စေ့စပ်သေချာစွာ နားလည်မှုနှင့် နက်ရှိုင်းစွာ ထိုးထွင်းသိမြင်မှု မရှိဘဲ မဖြစ်နိုင်သော လက်ရာပင် ဖြစ်ပေ၏။ ယေရှု၏ မျိုးရိုးစဉ်ဆက်ဆိုင်ရာ အပိုင်းများကို သူဖော်ပြသည့် ပုံစံမျိုးဖြင့် ယနေ့တိုင် မည်သည့် အခြားပညာရှင် သို့မဟုတ် ဓမ္မပညာရှင်ပင် မလုပ်နိုင်သော အရာပင် ဖြစ်သည်။ ဤစာအုပ်မှတစ်ဆင့်၊ စာရေးသူသည် ကမ္ဘာကြီး၊ အသင်းတော်နှင့် ပညာဗေဒဆိုင်ရာများ လိုက်နာကျင့်သုံးရမည့် ယုံကြည်ခြင်းလမ်းစဉ်ကို ရှင်းလင်းစွာ ဖော်ပြထားပါသည်။ ဤစာအုပ်သည် ဝိညာဉ်ရေးရာ ဆာလောင်မွတ်သိပ်နေသော ကာလတွင် ကိုရီးယား အသင်းတော်အပေါ် ချိုမြိန်သည့် ကောင်းချီးမင်္ဂလာ မိုးစက်များပင်ဖြစ်သည်ဟု ကျွန်ုပ် ယုံကြည်မိပါသည်။”

“ဒေါက်တာ အာဗြဟံ ပါ့ခ်၏ ဘဝတစ်ခုလုံး အောင်မြင်မှု လက်ရာဖြစ်သော ရွေးနှုတ်ခြင်းသမိုင်း စာအုပ်တွဲသည် သူ၏နက်နဲသော ရီဖော့(မ်) ယုံကြည်ခြင်းထဲမှ အမြစ်တွယ် ဆင်းသက်လာခြင်း ဖြစ်သည်။ ရီဖော့(မ်) သင်းအုပ်တစ်ပါး အဖြစ် ပဋိညာဉ်ဆိုင်ရာ သီအိုလိုဂျီအပေါ် သူ၏ဆက်ကပ်အပ်နှံမှု ထက်ပို၍ အမှတ်အသား ပြုပေးသော အယူအဆ မရှိပါ။ ဤအကြောင်းအရာ တစ်ခုတည်းကပင် သမ္မာကျမ်းစာ၏ ပြိုင်ဘက်ကင်းသော အခွင့်အာဏာဖြစ်မှု၊ ပဋိညာဉ်တရားအတွင်း သူ၏ ကယ်တင်ခြင်းဆိုင်ရာ ရည်ရွယ်ချက်အတွက် သမိုင်းတစ်လုံးကို ညွှန်ပြနေသော ဘုရားသခင်၏ တစ်ပါးတည်းသော အချုပ်အခြာအာဏာတော်၊ မိန်းမ၏အမျိုးအနွယ်အဖြစ် အပျိုကညာမှ ဖွားမြင်တော်မူသည့် လူသားမျိုးနွယ်၏ တစ်ပါးတည်းသော ကယ်တင်ရှင် ယေရှုခရစ်၏ အတုမရှိခြင်းတို့ကို ဖော်ပြထားပါသည်။ Dr. Park ၏အသက်တာနှင့် ဓမ္မအမှုတော်သည် ရီဖော့(မ်) သီအိုလိုဂျီနှင့် ဝန်ခံချက်ဆိုင်ရာ ဓမ္မဒဿနအပေါ် အချက်အချာကျ၍ ထိုအပေါ် အထူးအရေးပါသော ရပ်တည်မှုကို သက်သေပြနေပါသည်။ သူ၏တစ်သက်တာလုံး မြှုပ်နှံထားသည့် လက်ရာသည် ကျွန်ုပ်တို့၏ ဘုရားသခင် ထာဝရဘုရား၏ ပဋိညာဉ်တရား၌ သစ္စာရှိခြင်းနှင့်စပ်ဆိုင်သော ဆွေစဉ်မျိုးဆက်ဇယားကို ဖော်ထုတ်တင်ပြပေးခြင်းပင် ဖြစ်ပါသည်။”